Rov xav tswv yim. Rov xav txog tej yam koj tau ua txhaum txij li thaum koj tau txais lub Cim Daws Txhaum zaum tag los no. Muab tas nrho koj lub siab thiab lub tswv yim los xav saib koj tau ua dab tsi txhaum rau Huab Tais Ntuj Kaum Lo Lus Qhia. Qhov nram no, yuav pab me ntsis tswv yim los xav txog Tswv Ntuj Kaum Lo Lus Qhia thiab raws li lub Koom Txoos Kas Taus Liv kev ntseeg.

1. Koj yuav teev Huab Tais Ntuj ib tug xwb thiab koj yuav nyiam Huab Tais Ntuj tshaj tas puas tsav yam.

2. Koj yuav hwm Huab Tais Ntuj lub npe

3. Koj yuav caiv Huab Tais Ntuj hnub

4. Koj yuav hwm koj niam koj txiv

5. Koj tsis txhob tua neeg

6. Koj tsis txhob ze luag txwj luag nkawm

7. Koj tsis txhob ua tub sab tub nyiag

8. Koj tsis txob dag rau luag tej

9. Koj tsis txhob tso koj lub siab ntshaw zes luag txwj luag nkawm

10.Koj tsis txhob tso koj lub siab ntshaw ua tub sab tub nyiag

Yog muaj tej yam txhaum uas koj tu siab, thiab yog tej yam txaum loj uas koj tsis tau lees zaum tag los, mas koj yuav tau hais kom txhij. Koj yuav tau teev ib qho zuj zus thiab hais saib koj tau ua txhaum pes tsawg zaus. Yog koj tsis nco meej tias koj tau ua txhaum pes tsawg zaus, mas koj kwv yees xwb los tau. Txoj kev lees txhaum yuav pab kom koj txhob rov qab ua txhaum ntxiv lawm yav tod ntej, yog qhov zeem tseeb tias koj tu siab rau koj tej txhaum tiag. Koj txoj kev yuav xav kho koj lub neej, nrog rau Tswv Ntuj lub txiaj ntsim, yuav muab ib lub zog loj zog tawv rau koj, kom yuav yeej tau txoj kev haub ntxias kom ua txhaum lawm yav pem suab.

 

II. Thaum Mus Txais Lub Cim Daws Txhaum

Thaum koj nkag mus hauv chav tsev daws txhaum, Txiv Plig yuav hu thiab txais koj. Tom qab ntawd, koj yuav ua ntoo cuam lub cim (hais kom nrov, Txiv Plig thiaj li hnov koj), koj yuav hais raws li no:

“Hu txog Leej Txiv, thiab Leej Tub, thiab Leej Ntuj Plig lub npe. Ua Li.
”
Txiv Plig yuav hais kom koj tso siab rau Tswv Ntuj. Nws yuav hais li xws li no:

“Thov kom Tswv Ntuj nyob hauv koj siab thiab pab kom koj qhib siab hlo los leev koj tej txhaum.”

Ces koj yuav pib lees koj cov txhaum zoo li no:

“Tswv Ntuj, thov koj zam rau kuv tej uas kuv tau ua txhaum. Tau (ntev li cas lawm) uas kuv tsis tau tuaj dhau txhaum. Kuv tau ua txhaum xws li no: …”

Pib hais koj tej txhaum raws li koj nco. Koj pib lees qhov nyuab rau koj tshaj ua ntej, ces cov tom qab qhov thiaj li yooj yim rau koj lees mus ntxiv. Koj yuav hais kom tseeb thiab ncaj; tsis txhob zais, lees tej yam ua koj tau ua txhaum kom meej.

Yog koj tsis paub yuav pib qhov twg, koj thov kom Txiv Plig pab koj; Tso siab hais tias Txiv Plig pab koj ua lub cim daws txhaum mus rau qhov zoo.

Koj yuav teb txhua yam ua Txiv Plig yuav nug koj, tsis txhob ntshai thiab txaj muag. Tso siab rau Tswv Ntuj: Nws yog koj leej Txiv Tswv Ntuj uas khuv leej koj thiab xav zam rau koj. Thaum koj lees koj cov txhaum tas koj yuav xaus, koj yuav hais li no:
“… kuv tu siab rau tas txhua yam uas kuv tau ua txhaum lawm.”

Muaj tej zaum mas Txiv Plig yuav qhia koj kom koj txawj ua ib tug neeg ntseeg zoo. Nws yuav kom koj hais zaj tu siab rau koj tej txhaum thiab nws yuav qhia koj hais tej zaj lees txhaum.

Thaum koj hais tej zaj tu siab rau koj cov txhaum tag lawm mas, Txiv Plig yuav hais ib zaj thov Ntuj zoo li no:

“…Kuv hu txog Leej Txiv, thiab Leej Tub, thiab Leej Ntuj Plig lub npe, kuv daws koj cov txhaum.”

Thaum lub sij hawm Txiv Plig hais li no, koj yuav tau ua ntoo cuam lub cim thiab koj yuav teb hais tias:

“Ua Li”

Txiv Plig yuav xaus li no tias:

“Koj yuav ua Huab Tais Ntuj tsaug, vim nws siab zoo.”

Ces koj yuav teb hais tias:

“Tswv Ntuj txoj kev khuv leej yuav nyob mus li.”

Los tsis li ntawd, Txiv Plig yuav hais zoo li no:

“Tswv Ntuj tshem zam koj cov txhaum tas lawm, koj mu, koj nyob kaj lug!”

III. Tom Qab Txais Lub Cim Daws Txhaum Tas

Koj yuav ua Tswv Ntuj tsaug rau nws txoj kev khuv leej. Koj yuav hais kom tas cov zaj uas Txiv Plig qhia kom koj hais. Yog muaj tej yam txhaum ua koj tsis nco qab lees mas koj yuav nco ntsoov lees rau lwm zaus.

COV KAB KE UA LUB CIM DAWS TXHAUM
 

Tus mus txais lub cim daws txhaum yuav pib hais li no:
“Hu txog Leej Txiv, thiab Leej Tub, thiab Leej Ntuj Plig lub npe. Ua li.”

Muaj tej zaum Txiv Plig yuav hais li no:
“Thov kom Tswv Ntuj nyob hauv koj siab thiab pab koj lees koj tej txhaum uas koj tu siab rau”

Tus mus txais lub cim daws txhaum yuav hais li no:
“Tswv Ntuj, thov koj zam rau kuv, uas kuv tau ua txhaum. Tau ________ uas kuv tsis tau daws txhaum. Kuv muaj txhaum xws li no:”

Pib lees koj tej txhaum zoo li no:

“Kuv tu siab rau tas txhua yam txhaum uas kuv tau ua…..”

Thaum koj lees txhaum tas mas, Txiv Plig yuav qhia koj kom koj tu siab rau koj tej txhaum thiab nws yuav qhia koj hais zaj lees txhaum raws li no:

“Kuv tus Tswv Ntuj, kuv tu siab tas nrho rau kuv cov txhaum. Kuv tau ua txhaum rau koj, vim kuv tau ua yuam kev thiab kuv tsis txawj ua qhov zoo. Koj yog tus kuv nyiam tshaj tas puas tsav yam. Thov koj pab kuv, kuv yuav mob siab rau , tu siab rau kuv tej txhaum, kuv yuav tsis ua txhaum ntxiv, thiab yuav tsis ua yam ua yuav coj kuv mus rau txoj kev ua txhaum. Peb tus Cawm Seej Yes Xus Pleev tau txais kev txom nyem thiab kev tuag rau peb. Nyob hauv Nws lub npe thov koj khuv leej kuv. Ua Li.”

“Aub, kuv tus Tswv Ntuj, kuv tu siab tas nrho uas tau ua txhaum rau koj. Kuv tu siab rau tej kuv ua txhaum, vim.kuv ntshai tsam plam ntawm ntuj lub ceeb tsheej, thiab kuv ntshai txoj kev txom nyem nyob hauv dab phem teb. Tiam sim Tswv Ntuj, qhov tseem ceeb tshaj plaws,yog qhov ua txhaum rau koj. Tswv Ntuj tus ua kav tas txhia yam, tsim nyog kuv yuav nyiam koj. Thov koj txoj kev zam pab kuv, kuv yuav txiav siab los lees kuv cov txhaum, los tu siab rau kuv cov txhaum, thiab los coj lub neej tshiab. Ua Li.”

“Huab tais Yes Xus, Tswv Ntuj leej Tub, koj khuv leej kuv tus neeg txhaum. Ua Li.”

Ces Txiv Plig yuav hais zaj daws txhaum no:

“Tswv Ntuj tus khuv leej neeg. Koj Leej Tub txoj kev tuag thiab sawv rov qab los nqa txoj kev cawm rau lub ntiaj teb neeg thiab xa leej ntuj plig tuaj nyob nruab nrab peb, rau txoj kev zam hauv nyob hauv txoj kev ua txhaum. Thov kom Tswv Ntuj zam rau koj thiab pub txoj kev thaj yeeb rau koj nyob hauv lub Kom Txoos, thiab kuv hu txoj leej Txiv thiab leej Tub, thiab leej Ntuj Plig lub npe, kuv daws koj cov txhaum.”

Tus mus txais lub cim daws txhaum yuav teb hais tias:
“Ua Li”

Txiv Plig yuav xaus li no:
“Koj yuav ua Huab Tais Ntuj tsaug, vim nws siab zoo”

Tus mus txais lub cim daws txhaum yuav teb tias:
“Tswv Ntuj txoj kev khuv leej yuav nyob mus li.”

Los tsis li ntawd, Txiv Plig yuav hais zoo li no:
“Tswv Ntuj zam koj cov txhaum tas lawm, koj mus koj nyob kaj lug.”